::: 新文本運動 :::

「劇作家檔案」每季發佈一次，每期將會引介一位當代英國、德國或法國的劇作家，組織多篇專論文章以剖析劇作家的劇場美學、語言風格、在本地和外國的演出狀況等。同時亦會網羅大量劇作家的劇作出版及研究書目、評論列表、香港及華文界演出資料整理等，供有興趣的人士參考。

		尚－呂克．拉高斯（Jean-Luc Lagarce）－劇作

		劇本選段：《愛情故事》（Historie d’amour）
		中文翻譯：宮寶榮粵語翻譯：馮程程粵語翻譯顧問：Christine Cappio

一個作家，一個建築師，一個歌者。三個好友，兩對情人，他們到底有沒有愛過？《愛情故事》是一個人物無法被定義，情節充滿破綻，時間互相撞擊，空間流動如夢的戲劇世界。劇中分別以「男一」、「男二」和「女人」來表示三個不確定的角色，對白中充滿「我」與「他」的後設交換，並充斥著重覆、修正和互相矛盾的喃喃自囈，引領角色在敘事和回憶之間來回擺渡，以築構出一個無法確知的愛情故事。劇中共分三部份，同時在前後分別加上「序」和「尾聲」。以下所選是「序」的開首部份。

序

男一：	序幕。
	男一。
	某夜，只剩下男一獨自一人。大家忘記了他，不知道他的近況，不知道他遭遇了什麼事情。
	佢嘅遭遇。
	「他幾歲？」
	男一，某夜……
	呢一個，係有關兩個男人同一個女人嘅故事。
女人：	佢呢，女人（我），佢呀，佢喺度微笑。或者──冇乜人注意到佢──或者，佢係喊緊，匿埋喊，可能係。
	呢一個，係有關兩個男人同一個女人嘅故事。
男一：	某天夜裡。
	某天夜裡，他，男一。
	（呢一個，係一個兩個男人同一個女人嘅故事。）
	佢，男一。
女人：	到你。
男一：	係。我。
	男一，佢，我。──唔好搞亂我──男一離開佢屋企，
	佢離開曾經瞓過嘅嗰張床，
	佢將所有嘢丟哂。
	將佢地拋棄。（將思想）
	佢喺黑暗之中行走，穿過一條又一條馬路。
	唔知道點解成個城市都黑mung mung，
	睇嚟係，
	成個城市黑mung mung。
	呢一切都發生喺舊城區，同以前一模一樣嘅舊城區。
	或者
	──佢諗緊──
	或者佢唔了解，或者佢唔明白，或者連一個人都唔會再有。
	好可能所有人走哂──類似咁樣嘅一個故事──所有人本來可以連一個地址都冇留底就咁走咗，一個都冇留底，
	全部人一粒聲都冇就咁走咗，冇人話俾佢聽。
	佢地從來都唔會同我講。
	佢地可能逃走咗
	──佢諗緊──
	本來可以一粒聲都冇就逃走咗。
	又或者，佢地其實瞓緊覺，咁就簡單得多──只有佢先至會諗得咁複雜，
	佢地喺度瞓覺，可能係，可以係咁，佢地喺度瞓覺，合埋口，唔出聲。
	佢呢，男一，佢心諗，唔會再番嚟，呢個故事就會咁樣結束，
	佢斟酌每一個字
	同自己講
	呢個故事就係會咁樣結束。
	同自己講，自己喺度衰老──我係講緊呢樣嘢──佢喺度衰老，就係喺呢個時候，喺夜晚，喺城市裡面散步嘅時候，佢尤其衰老。
男二：	男二。
	序幕，主要係男一嘅故事，佢嘅出走，佢嘅理想幻滅。
女人：	我行埋一邊，同時又，非常接近。佢話佢自己唔算得係啲咩，一啲都唔重要。
	佢身處一個次要嘅背景，燈光昏暗，唔係好睇到佢。
男一：	男一。
	我一直就係咁樣生活。
	我唔知道，冇諗過，會有一日，例如係喺呢個夜晚，一切都會熄滅、結束。
	我地三個人一直咁樣喺埋一齊生活。
	故事嘅戲軌就係咁。
	我地三個人喺埋一齊生活。
	「我們那時候幾歲？」
	一切都發生喺舊城區。
	喺呢度，喺以前，乜嘢都冇，只有鄉間田野，冇馬路，冇屋。
	有一日，一個夜晚──就係呢個夜晚，一切都宣佈結束，我生活中嘅呢個階段就咁結束。我二十歲多啲啲，二十二三歲，大家對所發生嘅事都唔係太了解。
	有人背叛。
	男一，我（我扮演嗰一個），
	男一咁講，佢咁諗。
	佢咁寫，以佢嘅方式。
	佢寄咗一封信，封信係咁寫嘅：
	「有人背叛……」
	匿名信、情書，都令人覺得開心，我寫得唔夠多。
	佢離開咗被竇，離開咗屋企，向河邊行過去
	（嗰度，我地響嗰度留底咗），
	佢唔知道會發生乜嘢事，
	佢唔開心，心裡面淨係諗住呢樣嘢。
	有時候我會好享受呢種唔開心！
	我係！我享受呢種唔開心！
	咁做其實應該係一件好優雅，好靚嘅事，喺漆黑一片嘅城市裡面大叫（重複：在這漆黑一片的城裡）
	喺漆黑一片嘅城市裡面，
	喺呢個非常文雅嘅城市裡咁樣大叫，本來應該係一件好靚嘅事。
	《愛的故事》，係一個文雅嘅故事。
男二：	佢喺度笑。
女人：	朗讀：
	她輕輕地笑著，或者呢，躲在一旁哭泣，我記不得了。

（……）

編按：譯本曾於2014年5月24 – 25日在前進進牛棚劇場作讀劇演出。

::: 新文本運動 :::

編者前言

●

詩與生命的劇場敘事

專題文章

●	為後世書寫生死：尚—呂克．拉高斯

轉載文章

●	不再冷酷的生命異境：談拉高斯的《正是世界末日》
●	法式劇本尋找記
●	《愛情故事》導演的話

劇作

●	劇本選段：《愛情故事》（Historie d’amour）
●	劇本選段：《遺忘前的最後悔恨》
●	劇本選段：《不過就是世界末日》（Juste la fin du monde ）

參考資料

::: 新文本運動 :::